Om oss
Sommarljom er ein årleg musikkfestival i Ørsta på Sunnmøre. På Sommarljom opptrer musikarar som jobbar innan mange ulike sjangar som til dømes folkemusikk, jazz, klassisk, pop, electronica og country på same scene. Publikum får oppleve variert musikk av høg kvalitet i unike og intime lokaler.
Bakgrunnen for festivalen var eit spontant initiativ i 2011 fra to utflytta musikarar, operasongaren Karen Rosenberg Olsen og kontrabassist Audun Ellingsen. Dei såg at det var lite eller ingenting av kulturtilbod i fellesferien i Ørsta. Dei stabla då på beina ein konsert på kort varsel, og gjentok det sommaren etter. Festivalen har dei seinare åra vekse i omfang, og i år presenterer Sommarljom ni ulike band og artistar over tre dagar.
Namnet Sommarljom kom då publikum vart spurde om å tenkje ut forslag til kva denne festivalen kunne heite. Ordet «ljom» kan forklarast som ein «kraftig, vedvarande gjenklang, f. eks. mellom fjellveggar» og det ynskjer me å vektlegge, det akustiske og resonante og tilknytninga til naturen.
Per 2024 er styret samansett av Torgeir Hovden Standal, Synne Bergem Lia, Paula Holmberg Lewe og August Øyehaug Sellevold.
Sommarljom 2023 var støtta av Norsk kulturråd, Møre og Romsdal fylkeskommune, Ørsta kommune, Sparebanken Møre, Sparebank1 Søre Sunnmøre, Tussa Kraft, Fritt Ord, Bildende kunstneres hjelpefond, Jazzklubben Volda Ørsta, Ørsta Røde kors, Nynorsk kultursentrum - Aasentunet, Elektroservice, Berge og Co og Norsk Jazzforum. Tusen takk!
